Níl faoi cheilt atá sé go bhfuilim, an-tógtha leis an gcailín seo, agus go raibh mé ariamh. I ndiaidh oíche aréir, áfach, táim go hiomlán gafa léi.

Ceithre bliana ó shin, chaith mise oíche dheireanach mo scrúduithe Ardteistiméireachta in Vicar Street agus mé ag éisteacht le ceol binn Laura Marling, in éindí le dlúthchara liom. 

Agus mé ag tosú amach le mo chuid scrúduithe deireanacha anois san ollscoil inniu, airím go raibh sé oiriúnach dom oíche aréir faoi gheis arís ag Laura, san Olympia an uair seo.

Leis an fhírinne a rá, ní raibh mé chomh tógtha sin leis an albam is déanaí, Short Movie roimh aréir – éideimhne orm maidir leis an bhfuaim agus an stíl atá beagán níos leictrí.  D’aistrigh sé sin agus na hamhráin á chloisteáil agam óna béal, áfach, go háirithe agus iad fite fuaite lena amhráin uilig eile.  
 
Le chéile chruthaigh siad sreabh leanúnach (ní raibh ach b’fhéidir ceithre nó cúig bhriseadh idir na hamhráin a bhí fuaite le chéile den chuid is mó) sníomhach, trom le codarsnacht idir shólásach agus dhorcha, idir shuaimhneach agus ardghlórach.
 
An féidir liom díreach a rá gurb é an chulaith uirthi a chuir is mó iontas orm? Sciorta agus crop top bán. Crop top, like? If it’s good enough for Laura… 
 
Mar is i gcónaí, bhí Laura í fhéin ciúin, ciotach agus í ag labhairt leis an lucht féachana.  “Nice to see you all again… kind of.”  “…Sorry, I only say ‘kind of’ because I can’t really see you – it is nice to be here.”  Sin ráite, is máistreás an ardáin í – baineann sí úsáid as a guth ar nós uirlise breise, é á láidriú agus é drannach in amantaí, cé gur cuachaire binnghlórach í go nádúrtha.  
 
Thit an guailleán dá giotár ag pointe amháin den oíche (mar is léir sa bpictiúr thuas), ach d’éirigh léi leanúint leis an amhrán, aoibh gháire uirthi agus aonréad gairid á chaitheamh isteach san amhrán aici lena botúin a cheilt – a thuill scread ón lucht féachana.
 
So b’shin m’oíche le Laura, atá fásta agus cáiliúil anois.. uaimse, atá fásta ar éigean agus ag tabhairt aghaidh go gairid ar an domhan mór faoina mbíonn sí ag scríobh.  Is maith é go bhfuil sí mar treoraí agam fós.